شخصيات موجودة في كل عيلة

شخصيات موجودة في كل عيلة

------------------------------------------

في كل عيلة توجد مثل هذه الشخصيات اللتي

تضفي على الجلسات ألوان معينة

شوفوها :



الشخص الخفيف الدم اللي بيسلي القعدة


و عادة بيكون لسانه زفر شوي و مسموح له يحكي شو ما بده

طول ما هو عم بيضحك بالبشر

و هو اللي خالد لما يخطب لميا بيحكيلها عنه

لو تشوفي ابن عمي زياد نهفة بموتك ضحك

و بيجي زياد عالقعدة نافخ ريشه لأنه عرفان شو بينحكى وراه

و شو ما حكى زياد الكل بيضحك

حتى لو قال صباح الخير




نمامة العيلة


و هي عادة بتكون زوجة أحد الأعمام أو أولاد الأعمام

ما بعرف ليش ما تسألوني

هي اللي عندها الأخبار دايما

و أخبارها لازم تشيل نصها و تصدق نص اللي شلته مشان توصل للحقيقة

بتبهر و بتفلفل على كيفها و بتضيف من عندها

بيحبوها النسوان و بيكرهوها و بنفس الوقت بخافوا منها

بتحس هيي بأهميتها لما حدا يسألها شو الاخبار

و بتفرد حالها و بتبلش تذيع و بالآخر بتقولك بالله ما تجيبي سيرة اني قلت لك

انا شو دخلني ,بتعرفيني :بمشي الحيط الحيط و بقول يا رب السترة




غني العيلة


كل عيلة فيها واحد بيكون أغنى من الكل

و بكل عيلة بتكون مرته مركز نظر النساوين شو لبست ووين راحت و شو عملت

و بتكون نمامة العيلة متل الدنب الها مشان تجيبلهم الخبر اليقين

بتحكي من طرف مناخيرها

و بتقعد عطرف الكرسي كانها قرفانة

و اذا بتضيفها شي يا بترفضه يا بتاخده بس ما بتاكله ع اساس انها شبعانة ببيتها

كلامها و أحاديثها لا تتعدى شو عملت الفلبينية

و كيف تقاتلت مع السيرلنكية

و أديش الشوفير منشف دمها

يعني كمان شوي بتحزن عليها




كبير العيلة


و هذا اللي بدك تسد بوزك و تسمعه و هو بيعيد القصة مرة ورا مرة ورا مرة ورا مرة

بيحكيلك قصص أيام الحصيدة و الثلجة الكبيرة

و لما كان بالجيش

نص قصصة كذب بكذب او مبالغ فيها

((بقولو ما اكذب من شاب تغرب إلا ختيار ماتت أجياله))

كان رح يشتري نص البلد

وفندق ومطعم إنعرض علية بألف ليرة

لما كان كيلو اللحمة بعشرين قرش

ووو وخليها لربك




دكتور العيلة


و هذا المسكين اللي ما بيتهنى بقعدة

بس يوصل لمحل بيلتموا عليه و يا أمي خواصري عم يوجعوني

و شوف يابا مبارح و أنا لما ... (و بيصير يوشوشو)

و اللي بتنادي ابنها تعال ورجي الدكتور حلقك

هاتي معلقة يا غدير خليه يشوف زلاعيم أخوكي

و اللي بيعرض عليه راشيتات دكاترة تانية

و اللي بيجيب له صور اشعة

و اللي بقولوا شوفلي ضغطي - طبعاً كل القاعدين بفحصوا ضغطهم بعده -

و كل حياته بتكون هيك بغض النظر إن كانت زيارة أو عرس أو حفلة

طبعاً هو ما بيقصر

و ممكن يصير يقولك مين الحمار الي عطاك هذا الدوا ارميه و بيكتبلك غيره






متغرب العيلة


كل عيلة فيها على الاقل واحد بالخليج

بيجي بالصيف و الكل بيكون يستنى الهدايا

لما يوصل بيلاقي الكل متجمع و الكل بيسلم عليه

و بتكون امه عاملتله ورق عنب ( يبرق ) و كوسا

و شباب العيلة : وين هالغيبة و اشتقنالك يا ابو الزوز

و شوفلنا شغل معاك و الله أخوك ما لاقي ياكل

كأنه المسكين صاحب شركة هنيك

طبعاً الخرط بيشتغل من طرفه

و بيحكيلك عن سيارته البورش و بيته الفيلا و بيكون عايش مع تلاته بغرفة

بعد يومين بتلاقيه قاعد عالبلكونة بالشيال

لحاله بيشرب شاي

ولا حدا سائل فيه

و أمه بالمطبخ عم تعمل مجدرة





عزابي العيلة


او الدون جوان النسونجي

بيكون حليوة نسبيا طبعا

و بس يزور حدا من القرايب عندهم بنات بينضبوا

و بيصيروا يبصبصوا عليه من بعيد و بتشتغل المسجات

هدا بيكون عنده شوية غرور على شوية عجرفة

بيقعد و بيحط رجل على رجل و عادة بيصير عمره فوق الاربعين و ما بيتجوز

وبكل قعدة بيحكي عن غرامياته و بيتجمعوا حواليه شباب العيلة

و بيصير يفرجيهم صور و مسجات




شقفة العيلة احلى بنت بالعيلة


بتكون محط أنظار أولاد العم و الخال بس هيه نظرها بعيد شوي

بتمشي يا أرض اشتدي ما عليكي قدي

و بتقعد مع نساوين العيلة حتى يصيروا يمدحوا جمالها

كمان متل دون جوان العيلة ما بعجبها العجب و بتطوّل لتتجوز

إذا تجوزت اصلا

ما بتكون صحبة مع بنات العيلة و بتلاقيها دايما في الاعراس بتتلقط عريس من بعيد

من مبدأ نفسي فيه و تفو عليه




كمبيوترجي العيلة ( حدا من بيناتنا )


هذا طبعا بعد طفرة الكمبيوتر صار له اهمية كبيرة

بالأول كان الفاشل التافه اللي ما بيعرف شي

وضعه متل دكتور العيلة

و بتقول أمه بكل خيلاء

بس يجي علاء بيزبطلك الكومبيوتر

و الله ما في اشطر منه

مبارح خلانا نشوف عمرو دياب

و بيجي علاء المسكين

شوف كمبيوتر ابن خالتك اللعبة ما عم تشتغل

و بيجي حمودة و بيقعد يتفرج على علاء

مثله الاعلى بالحياة و هو بيشغّل الكومبيوتر

و ينبهر حموده

و بيفهمه علاء انه مشان تقدر تلعب اللعبة لازم بالأول تشغّل الكومبيوتر




طفل العيلة الموهوب


هذا اللي بكل لمة بنادوه يغني

تعال عبود غني لعمو اغنية اليسا لو تشوفو كيف بغنيها

و طبعا في نوعين من عبود في عبود اللي ما بيستحي

و بتلاقي قرفك و هو بيعيد الاغنية

و امه فرحانه فية و كل شوي بتقول ما شاء الله

كأنه ما حدا خلّف غيرها

او النوع اللي بتطلع روحك و امه بتقنعه يغني

و يللا فرجي عمو اديش انت شاطر

و بتصير انت بدك تخلص

بتقوله غني حبيبي بعطيك شوكولاتة

و بيكون بجيبتك شوكولاتة مفعسة من عرس قديم

بتفرجيه اياها كنوع من الاغراء

و في حالة كان دكتور العيله قاعد بيجي التهديد المباشر

اذا ما بتغني الدكتور بيضربك ابرة




MAD_FOX